انتشر كلام كتير عن عملة جديده اسمها باي نتورك ، وللاسف ناس كتير انخدعت فيها لانها ببساطه بتحصل على العمله بمجرد تحميل التطبيق خاص بيها اللى بيقوم بتعدين العمله عن طريق الموبايل
اذا نبدأ ونقول الحاجات اللى تخليك تشك في صدق هذا الوهم وتبعد عنه ، تحمل شويه لان المقال هيبقى طويل لكن هكتب بلغه بسيطه وعاميه
1- علشان تعمل عملة الكترونيه لازم يكون معاك فريق ومشروع للعمله
فريق عمله باي هم 3 اشخاص فقط المسؤلين عن بناء هذه العمله الجديده منهم واحد يعمل على التسويق ودكتوره تعمل على المنتج والمدير هو المبرمج ومدير المشروع ، وكل واحد منهم مسمي نفسه مدير للقسم اللى هو الوحيد فيه ، ودا قمة العبث والاستهتار بالعقول وكون انهم حاصلى على الدكتوراه من جامعة ستانفورد لا يأكد او ينفى نجاح او فشل هذا المشروع اذا توافرت له شروط النجاح
طيب ماذا عن مشروع العمله ، ببساطه لا يوجد
هل فى شركاء تم الاتفاق معهم او مخطط لها حتى لو محلات بقاله عادية لا يوجد
2- الموقع الخاص بيهم
موقع الشركة بطىء جداااا وكثير مش بيفتح من اول مره ، مش مستوعب ازاى هيعملوا بلوكشين وهما مش عارفين يضمنوا استمراريه موقع
الدومين اللى هو اسم الموقع عمره سنتين واحدة انتهت والتانية لسه مجدده يعنى عايزين يبقى اصحاب مشروع بملاين مش قادرين يدفعوا رسوم الدومين 5 سنين حتى على الاقل
هما نفسهم كاتبين فى الموقع ان المشروع فى المرحله الاولى ولا يضمنوا نجاحه
3- تعدين العمله
كل من له علم بمجال التعدين عارف تماما ان التعدين بيكون باجهزة مخصوص اسمها اسيك ودى صوتها على جداااااااا حتى انه اعلى من صوت ماتور رفع الماء وبتسحب كهرباء كتييييييير وبتطلع حراره عاليه بتوصل ل 85 درجة سليزيه وبتحتاج تبريد علشان متتحرقش
او عن طريق كروت الشاشه واللى الفرق بينها وبين اجهزة الاسيك فى الصوت فقط وبعض الامور الفنيه ، يعنى لو هتعمل تعدين بمعالج سيرفر 48 كور مثلا هيكون ربحك فى اليوم ربع دولار تقريبا وبعد شهر هتكون استهلكت البروسيسور
المريب بقى ان اصحاب العمله بيقولوا التعدين باستخدام الموبايل ودا قمة العبث لان انت هتدمر الموبايل قبل ما تقدر تجمع 1 دولار لو بتعدن اى عمله حقيقيه
الشيء الاهم التعدين بيتم بعد طرح العمله للتداول والتبادل بين الاشخاص ودا ليه بقى لان التعدين ببساطه هو عباره عن بناء بلوكات العمله وبعد كل بلوك صعوبه التعدين بتزيد وبيتم توزيع مكافأه اللى هى جزء من العمله على المعدنين وايضا لتأكيد عمليات تبادل العمله بين الافراد واللى بتاخد عليها عموله على التحويل ، طيب يظل السؤال هى فين العمله بقى اللى هتعدنوها
4- تطبيق الموبايل
نيجي للسؤال هو عايزك تثبت التطبيق بتاعهم ليييه ؟🤔
هنا هو مربط الفرس ، ازاى تحمل تطبيق هيعمل تعدين على موبايل وتسمح له بكل الصلاحيات علشان ينزل على الموبايل
اسأل نفسك هو عايز ياخد بيانات تليفونه والرقم المسلسل ليه
عايز يوصل لملفاتك وصورك وبياناتك ليييييييييييييه 😱
حتى الفايبريتور عايز يتحكم فيه 😂
5- العمله غير موجوده
بعد تتبع المنصات الشهيره فى المجال زى بينانس وبيتركس وبيتفنكس والماركت كاب، لقيت ان العمله غير موجوده بالمره وليس لها اى معلومه لدى المواقع الثقه دى
طبعا لانها لسه فى المرحله الاولى 😎
طيب يا ذكى انت بتعدن ايه ؟؟؟!!!!!! لما هى لسه فى المرحله الاولى
6- العمله ليس لها عقود او توكن
فى العاده عند طرح عمله جديده يتم عمل عقود لها قبل الطرح بحيث المطورين يحصلوا على التمويل اللازم لبدأ المشروع تسمى التوكن او عقود الاثيريوم ومقابل شراء هذه العقود انت بتاخد حصه من العمله قبل طرحها فى السوق وعند الطرح بيتم تحويل العملات دى لمحفظتك واللى بيكون فى العاده السعر اللى انت اشتريت بيه اقل من السعر اللى هتصدر بيه العمله بعد كدا ودا بناءا على جوده مشروعها والاقبال عليها، حاجه كدا زى ما تقول اكتتاب فى الاسهم، حتى الكلام دا برضه لا يضمن انك تكسب ممكن المشروع يفشل او ميلقيش له مكان فى السوق عادى جدااا ، ولنا فى عملة الدوجى كوين عبره
فى النهايه احب اقول انها عمله وهميه وراها مشروع تانى غير حقيقي فى الغالب هو تجميع بيانات عن الناس اللى بتحمل التطبيق او استغلالهم فى تعدين عمله تانيه من التطبيق وفى الاخر اصحاب العمله دى لو طلبوا فلوس من الناس بعد كدا هيدخلوا السجن ان شاء الله زى النصابه بتاعت الوان كوين
لو مفهمتش الكلام اللى فوق دا يبقى انت بالذات بتعد عن الموضوع دا خالص وموضوع العملات الالكترونيه دا من اساسه